Fake Facts

Wir Rudolf von gots genaden Ro^emischer chunig, cze allen czeiten ein merer dez reiches, tu^en kunt, daz wir haben angesechen und in unser chunichleich wi^erdikeit und lautterm gemu^et gunstichlich betracht, mit wew wir mugen unser plu^et lobleich erho^ehen und sein er und recht cze sterken. Davon wizzen alle kristen des heyligen reichs und unser getrewn, baider gegenwurtigen und chunftigen, daz fu^er uns komen di hochgeborn fusten [!] unser lieb su^en Albrecht und Růdolf herczogen cze O^esterich und cze Steyr, herren cze Krayn, auf der Marich und cze Portenaw, grafen cze Habspurch und ze Kyburch und lantgrafen cze Elsazzen, und mit in die pesten i^err lande, der erschinen vor unser ku^enichlichen ho^ech als liecht fakeln i^err lauttern trewn und paten uns dyemu^etichleich, daz wir bestêtten geru^echten die brief, die den vorgenanten landen von alten haydnischen und Christen kaysern und ku^enigen von i^err grozzen gu^ettet wegen gunstiklich geben wêrn, und daz wi^er in auch daru^eber gewunnen bestetigung der chu^erfu^ersten, wan si nu new herren in denselben landen wern^e, wan diselben brief gancz und gu^et und unverrucht an allen i^ern punden und artikeln warn. Der erst brief gewen ist von sêliger gedechtnusse weilnt Hainreychs dez vi^erden Ro^emischen chuniges, kayser Haynreichs sun, da im bestett sint czwen haydnisch brief, ainer der gewen ist von Julio dem ersten kayser, der ander der geben ist von Nerone dem durhæchtunden kayser, und derselb ku^enich Hainreichs brief geben ist Ernsten margrafen cze O^esterreich des jares, do man czalt von gotes gepu^ert tausent fumphczig und acht jar, cze Durrenpuch. Der ander brief geben ist von seliger gedechtnusse Fridreychs des ersten Romischen kaysers, damit er daz lant cze O^ester(reich) czu einem herzogentu^em gemacht hat, und der geben ist dem grozzen fu^ersten Haynreichen, dem ersten herczogen cze O^ester(reich), des jars, do man czalt von gotes gepurd tausent hundert fumfczig und segs jare, ze Regenspurch. Der dritte brief geben ist von Hainr(eich) seligen gedechtnusse weilnt Ro^emischen ku^enigs, der auch bestêtt alle freyung des egenanten landes cze O^ester(reich), der gewen ist dem frumen Leupolten herczog cze O^esterreich und cze Steyr des jares, do man czalt von gotes geburt tausend czwayhundert acht und czwainczig jar, cze Ezzlingen. Der vi^erd brief geben ist von seliger gedechtnusse Fridreychs des andern Ro^emischen kaysers, cze Jerusalem und Sicilii ku^enig, damit er bestêtt alle di freyung der egenanten lande cze O^ester(reich) und cze Steyr, der geben ist dem forichtsamen fu^ersten Fridreichen herczog cze Oster(reich) und ze Steyr und herre cze Chrayn, an demselben brief wir cze czeug(en) gesten, dieweil wi^er graf gewesen sein, der geben ist nach Christes geburt tausend czwayhundert und vi^erczig jar ze Pern.

Daz haben wir getan und haben bestetigt und vesten auch alle die brief, freyung und genade, die in denselben briefen begriffen sint, mit willen und gunst der chu^erfursten, der namen sint diese: Wenczla ku^enig cze Behem, Wernharts erczbischolfs cze Mayncz, Seyfrides erczbyscholf cze Cho^eln, Hainr(ich) erczbyscholf cze Tryer, Albr(echt) und Hans herczogen cze Sachssen, Ott marichgraf cze Brandenburch, Ludweyg phallenczgraf an dem Reyn und herczogen in Bayrn^e, also daz di vorgenanten fursten Albr(echt) und Ruedolf herczogen, unser lieb sune, und i^er erben und nachkomen an denselben landen alle die recht, freyung und genad haben schullen, als ob si in selb(en) gegeben wêren, in allen den landen, die si yeczunt habent oder hienach gewinnent. Ez schol auch den vorgenanten unsern sunen und ir erben und nachkomen und i^ern landen dhainen schaden bringen, ob der vargenanten brief dhainer oder yeder artikel besunderleich verruchkt oder czeprochen wer von wegen Otakchers chunigs ze Peheym oder Bela ku^enigs cze Ungern oder von nyeman andern oder noch czeprochen mo^echt werden, wand si die egenanten lant cze unrecht und in raubes weyse inne gehabt habent, sunder si schullen alle und yegleich recht, freyung und gewonhait haben in aller der mazze, als die obgenanten brief lautent.

Geben cze Reinueld durich hant maister Hainreichs, unsers obristen schreiber, des mo^eneydes Junii des aindleften tages nach Christes geburt tausent jar czwayhundert jar und in dem drey und achczigisten jar, unsers reichs in dem czechenten jar.